楊詩敏（蝦頭）和翟凱泰（泰臣）日前為兩人配音的電影《太空也入樽：改朝換代》接受《蘋果》訪問，原來這對好拍檔首次在配音上有對手戲，泰臣表示在演藝學院學習時代，單是學咬字，也吃了不少苦頭，泰臣說︰「我哋要用紅酒個木塞，放喺口中練講嘢，嗰時咬字唔清楚，好多懶音，但唔會因為你做劇場、做舞台演員就實識配。」蝦頭認同配音並非易事。

問到二人還想有何突破？蝦頭笑說︰「破破破，乜都想破，突然間想起一個『柱』字，破條大柱。一直支撐住自己係一條好大嘅柱，好難破咩？破多幾下就可以破到條柱。」在旁的泰臣笑到彎腰說︰「你覺得你兜得到咩？」蝦頭一本正經接着說︰「佢哋完全明白我講緊乜，碌柱一路支撐住你，你覺得好安全、好穩陣、好自在，但如果今次唔想玩咁粗嘅柱，一定要破一破喇！」泰臣搞笑說︰「究竟係換成條柱，定破咗柱留返條鋼筋呢？」蝦頭好認真回答他︰「離開TVB呢條柱，就要玩新嘢，例如唱歌。」泰臣笑指這是蝦頭的「柱」世之道。