劉嘉玲、邱淑貞、曾志偉、容祖兒等，今晚去到灣仔會展出席晚宴活動，好耐冇出席公開活動嘅豆斗，雖然已經50歲，但依然Keep得好好，志偉搶住笑話：「佢都冇keep過，真係唔公平。」問到豆斗會唔會再出山拍戲或者接真人騷節目？佢笑話：「都冇人搵我啦！我都一把年紀。不過我好忙湊細路，好難有時間，而且我都冇特別去諗呢樣嘢。」

豆斗生咗3個女，大女沈月更加係越大越靚，唔知有冇人傾過大女入行呢?豆斗話：「有，但我唔想，大女有人搵過，我唔想佢哋做呢行。」講到日前靚靚袁詠儀生日，豆斗同老公沈嘉偉都有份出席生日party，豆斗話當晚大家一齊玩得好開心。

而嘉玲就話成日都有同豆斗見面，跟住再轉頭問志偉：「講唔講得？」志偉點頭話ok，嘉玲繼續話：「我哋有個217聚會group，，當年志偉登六(60大壽)請咗大班人去島玩，費事阻住人休息，就用咗一間房，間房就係217，想玩嘅人就去呢間房，有Live Band可以唱下歌，飲下嘢，一齊玩，當時好多人去，有B哥哥、偉仔，學友、梁家輝、上山、葉童夫婦等，佢哋有定期聚會。」
咁間房會唔會最多係酒精呢?嘉玲笑話：「唔係，我哋好成熟，大家好錫身，好斯文，坐低傾下偈，學友開演唱會時，我哋都拉大隊一齊去睇。」

講到有傳偉仔想退休，嘉玲澄清話：「佢係藝術家，情緒病啫！佢o依家喺樽頸位，好多鍾意佢嘅Fans都想繼續睇到佢拍戲。」問到偉仔係咪唔想做？嘉玲笑話：「佢成日唔想做，我幫佢物色緊經理人，同佢夾得嚟嘅經理人，要了解佢。所以我暫時做住先，我唔想長做，唔想有拗撬，佢要o氹，軟硬兼施，我好明佢嘅皮性，等佢玩完一輪，遇到啱嘅導演同適合嘅戲會拍，呢輪幫佢推戲，佢唔想自己推，由我嚟諗藉口推，佢好幸福，應該珍惜(我)。」

另外，之前何麗全講過話想搵志偉做亞視司儀，問到志偉係咪會做？佢笑話：「冇，唔知咩嚟！成數同我高度一樣唔高。學豆斗咁講，我驚冇人睇，所以唔考慮。」