影后劉嘉玲下個月將會同秦沛及謝君豪，於灣仔演藝學院演出毛俊輝執導舞台劇《奪命證人》。為了今次演出，劉嘉玲今日就同毛俊輝、謝君豪等劇組人員到高等法院取經。

昨午（8號）二時許，嘉玲聯同助手、經理人鄧永鏘妹妹鄧霓儀等一行四人，乘七人抵達高院，未幾謝君豪亦抵達。一行入先後去咗一宗虐兒案、鷹君爭產案旁聽，留心觀察庭上律師的陳詞，前後夾埋聽咗一小時就齊齊離開。

昨日有大批記者喺高院採訪鷹君爭產案，嘉玲離開高院時，話現實與拍戲好大分別：「現實冇咁dramatic。」嘉玲話自己將會喺舞台劇飾演一個控方證人，佢觀察後發覺現實同拍戲不一樣，佢話：「（現實）冇乜嘢，好嚴肅。」但就話觀察後對演出有幫助。

之後嘉玲、謝君豪同毛俊輝等，同咗大律師伍宇鍔去附近香格里拉酒店飲茶傾偈繼續取經，傾咗一小時離開。嘉玲話：「因為同毛Sir、謝君豪一班舞台劇演員做個法庭嘅戲，所以嚟感受吓個氣氛。我今日聽咗幾個case，去咗四個廳，有啲係刑事案、有啲係販毒、有啲係家庭糾紛。」聽審之後有冇吸收？「一定有啦！因為成個氣氛，啲人嘅聲音、肢體語言，我覺得都會入咗我個腦。」

嘉玲去咗聽鷹君爭產案，問佢識唔識羅老太？嘉玲話：「我唔識佢，但都有睇報紙。」她又稱高院是非常嚴肅之地：「我覺得應該係要嚴肅啲，呢個係好嚴肅嘅事，唔可以開得半絲玩笑。法庭呢個地方應該要莊重，係要咁。」

《奪命證人》乃改編至Agatha Christie 於1925年的短篇小說《Witness For the Prosecution》，該劇曾在倫敦和美國百老匯舞台上演 ，曾獲紐約劇評家協會最佳外國戲劇獎，劇情充滿懸疑鬥智。舞台劇故事背景原設在倫敦，如今改編成90年代中的香港。故事講述一個富有的女人被謀殺前，曾修改遺囑，將巨額財產全部留給謝君豪，因而亦令謝君豪成為謀殺案的頭號嫌疑，幸好他太太劉嘉玲出庭，完美地為丈夫洗脫嫌疑。

相關新聞：
【鷹君爭產】滙豐律師4日半盤問完結 羅老太哭訴：法官老爺你要幫我！
https://bit.ly/2sR3yt0