做流動電話客戶好似做人老婆，越耐越冇人理你。我用咗數碼通7、8年，冇受過佢「恩惠」，但都係用數碼通嘅同事Mabel話：「我年年都收到佢哋送生日禮物喎，仲係Cova蛋糕喎！」
打電話去數碼通，佢哋話呢個係「PriorityPlus尊享服務」，用戶一年電話費滿3,600蚊可成為會員，一年內喺熱線或店舖都可獲優先服務，又享24小時旅遊及醫療熱線，生日會收到禮物等。我個個月交成400蚊，點解冇得做會員？數碼通回覆話，若客戶電話費夠數，會以短訊、電郵等通知，客戶要覆先可以做會員。佢話我喺04年曾申請停止接收宣傳，收唔到通知。我咪白白冇咗三個Cova蛋糕！
但如果我再申請接收資訊，手機咪又成日響？數碼通發言人話，𠵱家可以選擇只接收「特別優惠」資訊，包括PriorityPlus尊享服務，唔會收到其他宣傳；若仍然覺得煩，可以指定只收電郵資訊㖭。其實喺賬單提客戶有着數咪得囉，數碼通都係唔夠主動，抵鬧！
逢周一至周四刊出