韓國女星宋智孝近日正趕拍本月28號播出嘅JTBC新劇《老婆這週要出牆》，而劇組已經頻頻公開劇照為劇集造勢。今日劇組就公開咗智孝喺劇中嘅大學生裝扮，相中智孝孭住背囊，長髮及肩更顯清純。智孝雖然已經35歲，但扮起學生依仍然勁似！

喺劇中，就係呢個Look吸引到李善均，最後兩人更結婚生子。雖然兩人婚後生活都好順利，但到底因為咩事智孝先要出軌，令粉絲相當好奇。

另外，智孝喺《RM》中嘅好友李光洙，佢今日就擔任池錫辰主持嘅MBC電台節目嘅嘉賓，喺圈中人緣甚好嘅光洙就喺節目上提及型男好友趙寅成、宋仲基等，池錫辰先提到之前趙寅成曾經喺話光洙份人比較讓人操心，所以自己比較鍾意宋仲基，光洙就話自己冇因為趙寅成咁講而唔開心，仲自爆：「寅成哥後嚟有打電話畀我，話係講笑喎。」光洙提到同宋仲基變成老友係因為大家喺《RM》時認識，池錫辰仲爆料話二人親密到「同居」，又話：「佢哋由好早之前關係已經好好，有次我同智孝、金鐘國臨時決定去光洙屋企玩，點知係宋仲基開門畀我哋呢。」光洙即解釋話因為嗰日宋仲基就去咗去屋企過夜，又話：「佢如果嚟過夜，我會讓間大房畀佢，我就瞓梳化。」