當年今日
關於我們

701收料站:天鷹未必可高開

蘋果日報 2002/01/17 00:00


近排新股多到數唔晒,有啲賓架見個市稍為就啲細價股,就搏命趕上車。今日又有一間做電腦周邊硬件產銷嘅天鷹電腦(1129)上市,經紀陳話一早傳台灣幫圍齊飛,所以可能有得炒。
天鷹以每股50仙,發行1億股新股上市,集資額5000萬元。本來公開發售部分只得1500萬股,不過唔知點解個個都認定佢有得炒,有成58倍超額認購,搞到要喺配售部分撥番啲過去。
咁樣搞法,睇怕今朝都未必會高開好多,分分鐘等有貨者沽一陣先至再算。至於間公司基本因素如何?相信唔係太多人關心。
另外,停牌前係威係勢嘅華利資源(1215),復牌後除咗首日急升外,其餘日子都係載浮載沉。不過,靚女經紀噚日話,有人報料畀佢,話隻股想再開車,問小初信唔信得過。
隻股噚日升2%,收4.8仙。不過,大股東有一批輪行使價為1仙,所以好難玩。