平日拍戲都好少騷肌嘅《看見味道的少女》男星南宮民，近日拍攝緊同俞承豪、朴敏英等一齊主演嘅SBS劇集《Remember－兒子的戰爭》，劇集將於下月9號播出，所以班演員近日都埋頭趕戲，而日前劇組就公開咗最新劇照，當中南宮民大騷一身爆肌，令人眼前一亮。

據知南宮民平日喺劇中都飾演柔弱角色，或者做暖男，甚少有露肉嘅場面，點知為咗呢部新劇佢就竟然大晒本錢，而喺公開嘅劇照中，南宮民就享受緊按摩，佢瘦削嘅臉龐下，竟然有一身健碩嘅肌肉。

據知當佢除衫時，即時令拍攝現場嘅所有工作人員大表震驚，因為佢哋都唔知道，原來南宮民擁有一身咁勁嘅肌肉，同佢平日嘅形象完全相反。

南宮民喺劇中飾演超級大反派，性格生性放蕩不羈，兼且又有好多醜聞，仲把吃喝玩樂，作為佢人生嘅唯一目標，估計唔少觀眾，都因為想睇佢呢一身肌肉，而捧場睇呢部劇。