當年今日

求驗客手記:碧咸領紅避豬路雲 - 求驗客

蘋果日報 2009/08/17 00:00


洛杉磯銀河主力當路雲早排公開數臭隊友碧咸,雖然跟住兩人做番場大龍鳳講和,不過,佢哋兩個始終係有你冇我,點解?因為喺上周六迎戰西雅圖海灣者場美職聯,證實曾患上豬流感嘅當路雲喺下半場入替,但碧咸已經早走早着,喺上半場17分鐘做「紅牌阿姑」,呢張更係碧咸喺美職聯嘅第1張紅牌,結果最後9個踢10個嘅銀河輸0:2。
萬人迷美職首見「紅」
德甲班霸拜仁慕尼黑外號係「荷李活球隊」,不過,原裝正版嘅「荷李活球隊」洛杉磯銀河,一樣新聞多多。正當大家以為當路雲同碧咸不和事件,以及碧咸跟銀河球迷衝突事件告一段落之際,喺上周六銀河迎戰西雅圖海灣者場波,又有事發生。
雖然今次碧咸冇俾自己球迷噓,不過,佢喺上半場17分鐘,因為粗野攔截前隊友華真拿斯,結果直接領紅出場。今次係佢首次喺美職聯被逐,碧咸賽後就力撐自己唔應該領紅:「華真拿斯係我其中一名好朋友,而且喺我職業生涯之中,從未試過蓄意踢傷對手,我只係全心全意鏟波,唔應該領紅。」
empty
設計圖片及對白
當路雲落場散豬流感
碧咸應唔應該領紅,球迷可以睇片( http://web.mlsnet.com/media/video.jsp?content_id=6124137&team_id=t106&topic_id=t106)自己判斷,但我求大俠淨係知道佢同當路雲仲係有你冇我,而且仲可能係怕咗病君當路雲㖭。因為喺下半場開波碧咸已經被逐後,當路雲就以後備身份入替。
當路雲喺上周四先證實患上豬流感,我求大俠都唔明點解佢可以咁快落場,唔通銀河想打細菌戰?如果係嘅話,銀河呢招就唔work嘞,因為之後銀河再有中場路易斯被逐,雖然海灣者亦有後衞泰朗馬素爾領紅,不過銀河終嘗近兩個月來首次聯賽主場輸波。