學生細路豪今年讀中三，係三三四學制第一批學生，由於佢下學期就要升上高中，選科好重要，選得唔好，到咗二○一二年中六考試，如何升上大學，大費周章也，問細路豪有何選擇，佢答得爽快：「唔使諗，我一定選讀理化生，讀理科。」咦，咁醒目嘅？揀得好正宗噃，問佢為何如此決斷，細路豪話：「我啲地理、歷史、中文唔多掂，讀經濟、商科我仲係覺得好亂，不如就讀番理化生好過。」
細路豪父親係工程師，當然贊成，他日細路豪如果讀得好，有資格考工程師也。我哋以為好直截了當之事，原來並非理所當然，細路豪話全級學生冇人選純文科（中國文學、中史），學校被逼取消文科班，但選讀數理化嘅，又唔係好多喎，最多人揀嘅，係物理加經濟，化學加生物加IT一類。最受歡迎嘅，竟然係經濟，因為好多學生（其實可能受到父母影響，中三學生冇諗得咁遠吖嘛？）想話將來入大學讀財政金融經濟會計等等，一言以蔽之，未曾升上中四，已經諗住入大學讀商學院/經濟金融學院。
三三四之高中學制，學生必修中文、英文、數學與通識四科，再加三科選科，與現在嘅選科大大唔同。睇近年香港嘅求現實、求職業嘅趨勢嚟睇，最少學生選純文科，較少學生選純理科，大多數選所謂「理商科」，即經濟加一兩科理科之類。
重理輕文，乃香港中學生五十年來嘅傳統，如左丁山者，就因為讀物理不及格而讀文科，錯有錯着。但這十幾年來，學生興起重商輕理之風，個個發夢讀QFM（計量財務）、精算、Global（環球商業），今年九月後，如果大部份中四學生都選讀商科，香港十年後都唔知邊度去搵人做工程師。老實講，選讀純理科（即四科必修加物理化學生物）嘅學生，申請大學嘅靈活度最大，可選醫、工、商、理、社五大學院，反而選讀商科嘅，讀醫、讀工就未必可能，其實喺中學唔讀經濟學，到大學追番，完全唔係問題，使乜咁快就在高中放棄純文純理吖。