持續半個月嘅熱浪終告一段落，前幾日沙田晨操試閘，朝早九點史卓豐試完閘已滿頭大汗，然後講了一個單字：「boiling」，即係條跑道好似熱滾咗咁，佢哋開工時除咗隨身袋條濕毛巾，就別無其他方法消暑。

今日（3日）沙田第四場四班草地1200米，3歲馬「陽光假日」馬名夠晒應景，此駒4月8日服役初出直路賽跑第八後，即拉倉由鄭俊偉轉至姚本輝馬房，今仗轉倉初出兼扳上1200米，鞍上人仍然係郭能。

郭能話「陽光假日」上仗初出名次表面上普通，但末段有追勢，深信匹馬有一定質素，所以轉倉後立即向姚本輝索騎，果然保得住帥權。

「陽光假日」上月25日酷熱天氣警告下試閘，結果只輸俾5戰全勝之明星馬「以奇用兵」1.5個馬位得第二名，進度再進一步。

郭能估計好多馬迷因為呢課閘，會份外留意「陽光假日」，佢就好坦白話此駒可能心智未成熟，出閘同初頭二、三百米集中力唔夠，會分心東張西望，呢課閘仍有呢個陋習，惟有寄望今日唔好再犯同樣毛病啦。

不過，「陽光假日」呢場對手唔算強，只得隻「歐洲巨星」同「馬狀元」季內贏過，「陽光假日」憑質素搭夠贏馬，一啲都唔奇。