今年立法會選舉奇人奇事一籮，最新一單可能係歷年選舉騎呢事之冠。民主黨主席何俊仁，日前報名出選新界西，點知噚日卻要再次交表，原來佢參選名單上排第二位候選人朱順雅，竟然唔係選民，冇參選資格，十分蝦碌。

未有更新地址資料

朱順雅話佢近年曾搬屋，由於都係搬到附近，仍然係同一個區議會選區，以為唔使通知選舉事務處更新地址，仍然有選民資格，點知原來唔係。選舉事務處先後兩次以平郵及掛號寄信去朱順雅舊地址，由於佢已搬屋，自然兩次都打回頭，由於未能接觸朱順雅更新地址，所以就根據相關法律條文，取消其選民資格。
朱順雅承認今次係自己疏忽，向公眾道歉。好彩佢參選與否，影響唔到大局，否則連累黨主席，真係唔知點同佢算賬，𠵱家最大損失可能係已製成嘅宣傳品作廢，無端端嘥一筆錢。何俊仁噚日再次報名，由四人組隊參選變成三人行，新參選名單仍然由佢帶隊，第二、三位分別係許智峰同盧民漢。