政府今日宣佈行政長官會同行政會議決定正式向奇妙電視有限公司（奇妙電視）批出本地免費電視節目服務牌照，牌照有效期為12年，即係無綫、ViuTV同港台電視31又有競爭對手，不過曾任香港有線電視（HKCABLE）娛樂總監黎文卓，就認為奇妙電視加入，對免費電視戰影響唔大。

對於奇妙電視批出本地電視節目服務牌照，佢認為多一個頻道對電視發展冇咩太大影響，有線都係用番自己播緊嘅資源去做，佢認為好難好似無綫咁樣投資咁多，呢啲免費大氣電波電視畀佢都係一個雞肋，佢自己可能都會覺得可能係會增加佢負擔，而未必同收入成正軌，佢續言：「我自己覺得係當多一個台，亦對好多從業員嚟講唔係好開心會有一個台起，因為見唔到要大量請人，我自己都睇唔到。」講真又係嘅……話晒之前亞視被熄機兼收回免費牌照，有唔少行內人失業，今次開多個免費電視台，未知將來有冇機會有更多就業機會。

問到奇妙電視係唔係似ViuTV咁？黎文卓就話：「o依家網上其他嘢睇，即使100毛嗰啲，網上頻道都好多嘢睇，o依家香港唔係冇嘢睇，係太多、太多嘢睇，要做到吸引人睇，要一定資源，冇資源畀更多嘅平台都冇用，呢個係一個對電視人嚟講一個矛盾，尤其香港咁細市場，我真係好用心機去搞節目，資源出去收唔收得番，管理層都要計數。個餅夠唔夠食呢？」

此外，仲記得當初香港電視都有申請做免費電視，不過最終政府冇畀牌佢，王維基之前製作多又點呢，黎文卓直言：「王維基嗰時作為一個創作人，一個有心做嘢嘅電視人都好，好多理想，呢種實唔實際，大環境轉變，可唔可行都未知。」