坐入立法會三年，長毛「玩嘢」功力與日俱增，以前特首讀施政報告、財爺發表預算案，佢例牌企起身大嗌抗議口號，主席范太等佢擾攘一輪，就施施然叫佢離席，兩人一唱一和已經甚有默契，今年文革曾讀施政報告，長毛一反常態坐足全場。
長毛唔係轉性搞和諧，噚日立法會辯論施政報告佢出新招，呢次仲係正宗「屎橋」。佢發言時拎出一個狗兜，入面有一堆假狗屎，在場者見狀不禁打醒精神，睇吓長毛今次搞邊科。長毛話呢堆狗屎係諷刺文革曾踩民主嘅言論「狗屎不如」，更加侮辱咗一直爭取民主嘅香港人，令人厭惡嘅程度，同迫人食狗屎無異！

長毛講到興起，手執假狗屎手舞足蹈，好彩唔係真嘢啫，否則大家真係多得佢唔少。佢發言到尾聲時，仲忍唔住喺會議廳怒拋狗屎，雖然係假嘢，但已經令一啲女士花容失色，主持會議嘅自由黨副主席劉健儀，即刻叫佢執走呢啲恐怖道具，唔好冇手尾。
長毛兄弟、社民連陳偉業對呢條「屎橋」甚為欣賞，不過就笑佢自己拋狗屎，又要自己執番啲「蘇州屎」，好似有啲失威。