當年今日
關於我們

鍾培生林作開記招交代「百萬林鍾一戰」8大條款 林媽晒腿搶鏡

蘋果日報 2021/03/05 21:43

鍾培生林作林鍾一戰

俗語有云「先撩者賤,打死無怨」,鍾培生早前約林作挑戰「百萬林鍾一戰」,雷聲大雨點小,連日二人隔空展開N場牙骹戰,口水四濺,讓網民質疑炒作,批評要打就快打。在鍾培生連番催促下,林作終於簽署擂台戰合約,並簽生死狀,引起全城熱話的「百萬林鍾一戰」將在9月中開戰,一共打4個回合,每回合2分鐘,如果林作臨時縮沙要賠償宣傳損失。
林作和鍾培生身穿西裝,今午3點幾鍾培生與林作開記招交代合約細節,又變成「口水戰」,吸引過百傳媒到場。林作稱今次會認真去打,鍾培生則講明會拖慢打,不會太快KO林作,林作媽咪Lily就十分希望兒子打百萬擂台戰,今日到場支持。
empty
鍾培生(右)在記招上,不時寸爆林作 (左),句句有骨。

鍾培生成程嬲爆爆

記者會開始前,林作和鍾培生應要求讓在場傳媒拍照,再坐下一齊受訪,記者會甫開始,鍾培生已顯露不滿情緒,動作及表情明顯不耐煩,相反林作全程尷尬地笑,不時抓頭摸面,鏡頭前鍾培生明顯懶理林作,眼尾也不望對方。
林作指拿到100萬出場費會投資在自己事業,又透露合約內容:「按照合約,可按照自己磅數,公平嘅。我一定會認真打,希望打贏,信心有嘅!做嘢我好少冇信心。」他又多謝鍾培生給予足夠時間訓練:「比賽喺9月中,林作會係一個不同嘅人,會係一個拳手。」此時鍾培生即插嘴,嘲林作是屎,「little piece of shxt變咗big piece of shxt」、「冇我,你係一文不值囉!係我先定到你價位」。而林作指100萬元拳酬吸引可以醫大病時,鍾培生聽畢即寸爆講:「醫返你個腦啦!」
鍾培生有打開拳,林作是拳界初哥,但林作稱不怕欠缺經驗,自稱上手快,有運動細胞,下星期開始會接受向柏榮師傅的訓練,又吹水說已睇電影熟習拳擊運動,「我都睇咗好多電影,首先係何金銀(周星馳《破壞之王》角色)」,鍾培生聽到即擰頭。
empty

每超重0.5kg 賠1千

鍾培生提出「出賽限重」,量秤於賽事前一日舉行,如鍾培生超重,判林作技術勝出,若雙方可以商量照打,鍾培生每超重0.5kg 賠1千元,而林作不受限,鍾培生亦同意賽後向林作支付表演及出賽費用100萬元。畢竟拳腳無眼,林作之前從未學過打拳,為免打死無命賠,林作由下星期開始將接受幾個月特訓,努力準備應戰。
被問到會否立遺囑?林作趁機sell保險:「冇冇冇,買多份人壽,保險最實際。」林作又指媽媽比自己更肉緊出場費:「佢好希望快啲打,佢以為今日打,所以坐咗喺後面,我覺得我屋企人唔係好鍾意我。」鍾培生連問三次:「有邊個鍾意你?」
鍾培生非常輕視林作:「如果我認真打,10秒就knock(擊倒)佢,我成日講係要fxxking break him!」鍾培生表示有向師傅指導,不怕打死林作,「我本來係想搵殯儀館sponsor,不過而家搵輪椅會好啲」,林作反駁培生培心會員有「漢奸」倒戈支持自己,鍾培生反唇相譏:「收皮啦!你啲自信邊度嚟?You’re piece of shxt,你照鏡時候有冇蒙羞?」
鍾培生連番貶低林作:「佢嘅人生讀咁多書,得一個價值,就係坐喺我隔籬俾人打。」有人擔心林作在擂台上出陰招,鍾培生鬧林作是屎:「你哋睇清楚佢嗰樣,睇吓呢pat屎可以做咩出嚟?呢pat屎如果喺台上面出陰招,我會唔會揼爆佢?Look at me, I’m fxxking champ.」
雙方簽訂合約8大條款
1.賽事為拳擊形式進行。
2.賽事以4回合,每回合2分鐘進行。
3.鍾培生出賽限重,量秤於賽事前一天內舉行。
4.鍾培生的重量在量秤時超越合約所規定重量,如無守約,林作直接獲判技術勝出。若協商後依照安排比賽,超重一方需賠償對手每每0.5kg港幣1千元。而林作則不設此限。
5.佩戴拳套為10盎司。
6.鍾培生同意無論賽事結果,均需於賽後向林作支付表演/出賽費用港幣一百萬元。
7.除合約個方面因拳擊賽引致拳手死亡及或受傷的任何責任,包括但不限於所有日後之法律追討賠償等,拳手亦承諾不能向主辦方及有關人士單位追討。
8.但如林作違反合約包括但不限於無法出席賽事,則鍾培生無需支付上述款項,林作須賠償期間所有宣傳支出。
empty
鍾培生全程扮cool,幾乎不望對手林作一眼。
empty
二人言談間散發出濃烈火藥味。
empty
林作帶媽咪到場,全程嬉皮笑臉。
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁