時間：1991年7月

地點：跑馬地馬場

人物：黎明

經過：歌手唱歌走音經常發生，但走音走到俾人用嚟做手機電話鈴聲，相信都係黎明最經典。1991年7月，華東水災危情告急，香港七大電子傳媒包括無綫、亞視、港台、商台、新城、有線同鳳凰衛視立即發起舉行一個籌款節目，名為《演藝界總動員忘我大滙演》，全港紅星齊齊出動，包括鍾楚紅、徐小鳳、梅艷芳、成龍、溫拿五虎、梁朝偉同黎明等等，當日喺跑馬地馬場進行咗八小時馬拉松式籌款，結果籌得1.2億港元。
黎明當日表演完畢之後離開，點知後來劉鑾雄前妻寶詠琴再捐50萬贊助黎明唱歌，為做善事，黎明立即趕返去馬場表演，唱咗首《對不起我愛你》，唔知佢係咪喺冇準備之下唱呢首歌，佢唱到「我又怕心難死」嘅時候竟然走音，黎明即刻好尷尬咁笑住擰頭，點知唱到尾段時又再走音，真係瘀到冇人有，因為今次事件，黎明獲封「走音天王」，每次有傳媒問番佢呢件事，佢都好唔開心兼黑面。可惜佢越唔想講就越多人談論，俾人講足十幾年，佢當年走音片段仲俾人放上網重溫，甚至做埋手機鈴聲，真係陰功。
本欄逢周一至周六刊出