對上兩季煞科戰分別有「飛天龍駒」及「巨無霸」匆出贏馬，證明唞暑前仍然頻密上陣，幕後不打無把握之仗。

周日賽事將有11駒剛於上周五回歸日或前晚谷草煞科戰跑完，隨即匆匆再出，隨時又會有頭馬從中誕生。

最值得留意的首推第六場「駿馬翹楚」，事關摩廐近兩駒匆出用莫雷拉均掄元，包括「花月流星」及「佳龍駒」。「駿馬翹楚」今次打王牌配雷神匆出，看來想在歇暑前贏馬交代。

另外，頭場「知道勝」剛於回歸日配蔣嘉琦被捧成大熱，可惜直路連番受困未能望空，結果只得梗頸四，匆匆又跑且加強配搭用潘頓，爭勝決心非常明顯，同樣有重視必要。