求驗客手記:躁狂之夜輸波輸品
阿達杜倫飛砵掟旁證
星期二英聯盃車路士贏利物浦有迪亞高哥斯達踩㷫全場,𠵱家被英足總控告隨時要停賽,到周三西班牙盃八強次回合賽事一樣咁火爆,馬德里體育會喺主場迎戰巴塞隆拿,兩度領先都贏唔到以2:3輸波,總比數2:4出局。成班馬體會球員越踢越忟,先有費蘭度托利斯(費托)喺半場同尼馬爭執,下半場更加誇張,中場阿達杜倫嬲到向旁證飛砵。
今場波球證基爾真係出牌都出到手軟,加埋有七個馬體會球員領黃牌,其中隊長基比同埋馬里奧蘇亞雷斯都係兩黃一紅出場。今場波五個入球全部都喺上半場出現,馬體會喺開賽三十八秒就先開紀錄,第一個攻勢就由費托搞掂,但到九分鐘巴塞就由尼馬扳平。到三十分鐘馬體會再次領先,之後巴塞又扳平不特止,到四十一分鐘由尼馬入多球反超前到3:2。
今場波馬體會急於收復失地,踢得非常進取,到上半場中段控球率仲比巴塞多,而雙方埋牙情況亦唔少。當完半場嗰陣,馬體會中場魯爾加西亞同尼馬喺球員通道口角,之後費托都加入戰團同尼馬嘈埋一份;情況混亂之際,基比衰多口鬧球證,結果拎佢第二面黃牌被逐。
換邊之後馬體會球員依然好躁,土耳其中場阿達杜倫喺四十八分鐘被巴塞球員圍住搶走個波,似乎唔滿意球證冇吹罰,嬲到爆之下拎起佢被踩甩咗嘅左腳波砵,向場邊旁證方向掟過去。雖然冇掟中,但呢個嚴重挑釁執法裁判嘅行為其實算係暴力行為,但球證基爾事後只係向杜倫出示一面黃牌,真係算佢好彩。
尼馬(右)今仗威威,梅開二度幫巴塞晉級西盃四強。 美聯社
場波雖然再冇波入,但火藥味就繼續增加,一次馬體會犯規之後,右閘桑法蘭托里斯向尼馬舉起七隻手指,應該係揶揄佢嘅巴西國家隊喺上年世盃四強以1:7慘敗畀德國。其實尼馬都冇份喺嗰場波上陣,桑法蘭你隊西班牙喺小組出局,又點寸巴西,何必輸波再輸埋品呢?巴塞教練安歷基賽後都話,場波越踢越唔對路,怕尼馬留喺場上遲早受傷,所以就調走佢。
麻煩嘢仲有喺今場波冇份上陣嘅馬體會守將安沙迪,比賽前被警方截查後發生爭執,再涉嫌用車門夾警察,被帶返差館協助調查。
識睇,一定係睇足英台【英波Live】:
http://soccer.appledaily.com
http://bit.ly/engballlive