六年時間話長唔長，話短點都唔算短，尤其在後生仔來講，但對今晚（13日）快活谷第一場五班1800米的「強中堅」，過去六年就絕對冇虛度光陰。

回顧「強中堅」於12年6月13日，第一次在港出賽，當時由孫達志訓練，於郭立基胯下52倍跑第二，自此贏過四場，此對騎練二人已離港多時，眨眼六年之後同一晚，「強中堅」已經嚟到十歲之年，是全港最老馬匹，亦都到咗競賽生涯尾聲。

「強中堅」最近兩個幾月一直操而不戰，睇得出練馬師李易達都好想幫佢爭取最後勝利，順便為自己努力爭取頭馬盡快贏夠16WIN畢業。