金管局總裁陳德霖(Norman)退休前都仲好有魄力，剛過去幾日，同副總裁阮國恒(Arthur)率領一班港銀獨立非執董及賓架，浩浩蕩蕩北上參與研習和交流。

一團三十人，每一位都極具份量，好似東亞獨立非執董范徐麗泰、唐英年，人稱「柯大俠」柯清輝都一齊學習、學習。

滙豐香港、恒生、花旗香港三位女CEO施穎恩、鄭慧敏及伍燕儀都有出席，中銀香港總裁高迎欣亦有撐場。

港銀獨立非執董及賓架已經係第四次返內地進行研修，呢次仲直接同中銀保監會主席郭樹清交流，探討兩地銀行業踲發展方向，以及對銀行監管嘅挑戰；亦從國際形勢中分析中國的外交策略、戰略思維和創新機遇等。

陳德霖仲話，金管局和中銀保監會合辦嘅研修班，一向得到參與者高度評價，仲被多次要求續辦，未來都會繼續保持緊密合作，加強港銀在內地嘅業務發展優勢。