楊千嬅同老公丁子高聯袂到尖沙嘴洲際酒店出席「領賢慈善基金」慈善晚會，見千嬅一臉疲態，她稱：「因為屋企局部裝修，老公經常要飛，自己朝早七點起身湊小朋友返學，跟住做家務買生果，一陣又要返屋企執嘢，今次幫囝囝房裝修。」

講講下千嬅自爆老公夜晚扮鬼，丁子高解釋：「因為囝囝瞓喺老婆隔籬，唔想嘈醒佢，所以用iPhone電筒照醒千嬅，佢可能以為係賊大嗌。」

問到身為老公的地位是否被兒子霸佔了？丁生扮呷醋說：「係囉，邊個男人瞓喺你側邊。」千嬅聞言即啋，她指如果老公不在家，兒子就鍾意黐自己，可能異性相吸。問到會否羨慕Eason跟女高音合唱？佢笑笑話：「唔緊要，人生充滿信心，使乜羨慕，自己可以喺位叩杯唱。」

問到千嬅係咪頂替劉德華年尾紅館檔期？佢坦言：「應該有好消息，公司安排緊，場數量力而為，自己唔係貪心嘅人。」

鍾鎮濤（阿B）都同范姜拍拖現身，佢話父親節收到卡做禮物：「鍾幗送Superman油畫，冧到Superman塊面都甩色，但唔係好似我，佢盡力畫，我都好高興。」對於譚詠麟喺父親節貼同囝囝牽手相，阿B笑言：「唔係曉風，係許冠傑，點解以前我同佢開騷，佢唔拉我隻手。」