許廷鏗以仁濟慈善之星身份，聯同鄭欣宜、何傲兒、胡渭康及戴夢夢等，去到荃灣出席「仁濟慈善行2015」。

一眾嘉賓以一身睡袍造型出席，許廷鏗話方便佢今朝起身唔使特別置裝，仲出動埋私伙晨褸，聖誕節係許媽媽生日，許廷鏗話:「通常會同媽咪預早慶祝，聖誕會同啲朋友去偏遠地方聚吓。」

何傲兒同埋公司一眾同事出席慈善行，但老闆林建名就冇出席，傲兒話噚日參與聖誕派對，自己送出枕頭，又收到男士親手做嘅手作為聖誕禮物好sweet，對於有否收到老闆嘅聖誕禮物，傲兒話:「冇諗過人哋送嘢畀我，應趁機會同人講多謝，下星期公司聖誕party，會考慮自己做禮物。」對於會否預備禮物畀周子揚，傲兒話:「過去唔代表現在，活在當下，好耐冇聯絡。」

鄭欣宜早前爆以前一個男友變咗性取向，欣宜話:「佢冇嬲，佢已經好公開，分享過好多次，當年一齊17歲，o依家好多話題乜都講，但係冇問過佢識男友嘅意見。」