雖然教育局未宣佈復課日期，但自由黨黨魁鍾國斌都擔心一眾學生復課後無口罩用，行過見到教育界葉建源就即刻喺褲袋拎咗兩個畀佢，叫佢搵啲學生試用，啱用就同佢買咁話喎。

八方見鍾國斌今日都戴上私家布口罩，但唔知係咪因為焗得滯，傾傾吓都要除低個口罩落嚟唞啖氣，有見及此，八方都問吓葉建源嘅用後感。

葉建源就話雖然戴布口罩會比一般外科口罩焗啲，但尚算可以接受嘅，所以都會畀啲學生試用吓，睇吓個尺寸啱唔啱同埋佢哋覺得點，再考慮買唔買。

另外，葉建源亦擔心遲啲復課，學生們、工友們一人一個外科口罩，會對環境負荷好重，所以長遠嚟講，佢都話布口罩係一個可行嘅方法。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架