以往的見習生培訓，全部於上水雙魚河馬會進行，一年訓練就派往馬場供練馬師借用，覺得好就收到門下，過程其實係精華培訓，接觸馬匹其實都唔算多，騎功更根本未夠班同外地師傅比較，只有磅輕幫助，所以好多根本連搵隻坐騎都難，畢業等於失業，好多轉做幕後，文家良、姚本輝、呂健威等都係第一同第二屆畢業生。

陳念慈上場當校長，改用精英運動員培訓方法，將受訓基本完成課程之學員送到澳紐、南非等地實習，上陣機會又多，又更加改善英文能力，回港後基本上大都已經有幾十場贏馬經驗，仲依然有十磅可以減，戰鬥能力十分強，大受練馬師、馬主樂意聘用，陳念慈應記一功。

今期賽事方面，介紹第二場四班1000米「貝奇利」，潘明輝由開操一手一腳打理，至9月8日泥閘，全程隻馬自動走，鬥心湧現，而且1000米直路賽曾鬥「旅遊皇者」，呢場對手一般，磅輕7檔不俗，可打開勝利之門。

還有第六場四班1400米「自動波」，巫顯東一手操，馬有均速又可以鬥後勁，非常適合輕磅見習生發揮，六月輸俾質高的「承你所願」半馬位得第二，今場可以博冷。

文：沈國成(Now668台賽馬評述員)
Now 668台今期(16日)中午12時起直播賽馬直擊