有人出書為咗掙錢，有人出書為咗出名。八方呢位朋友，出書，係為咗討好兩個人──中風卧床嘅老婆同埋唔夠1歲嘅BB女。《蘋果》讀者應該估到八方講邊個，上年產後中風卧病不起嘅阿蚊，佢老公Anthony一直喺網誌講述老婆病情同分享自己感受，喚起無數網友愛心關注。Anthony最近同出版社合作，將網誌文章輯錄成書，再加上新嘅內容，寫成《陪着你走》，最快今個月底出版。

望接妻回家療養

Anthony希望透過作品，見證愛妻同病魔搏鬥嘅歷程。阿蚊係為咗生下BB女霖霖而患病，未夠1歲嘅霖霖仲未了解媽媽嘅付出，Anthony好想霖霖長大之後，睇番本書，知道佢有一個咁偉大嘅母親。Anthony話，佢唔等錢使，作品賣到幾多錢都冇所謂，但係如果可以收到一筆稿費，支援一下阿蚊以後嘅長期治療都好。
阿蚊生日在即，新書算係佢嘅生日禮物。最近病情依然有少少反覆，Anthony好想阿蚊快啲出院，返屋企療養，咁樣就可以一家人共敍天倫。醫生同意嘅話，Anthony仲想同阿蚊一齊切生日蛋糕，雖然阿蚊要靠胃喉進食，品嚐唔到食物嘅味道，但係點都叫做食過生日蛋糕。