近年謝霆鋒轉戰大陸市場，更加轉行唔做影帝做廚神，先係搞咗個《十二道鋒味》，一路Chok一路煮嘢食，再開咗間「鋒味曲奇」，今年月頭仲拍咗套《鋒味江湖之決戰食神》，睇嚟佢對飲食嘅執著都好深下。

今日霆鋒又有新搞作喇，今次就犀利喇，霆鋒同大陸麥當勞合作，推出咗一個「星廚系列」，推出咗一個新包叫做「霆鋒酷辣雞腿堡」，仲玩埋甜品，整咗個「鋒味曲奇」Crossover麥旋風，仲推出港式鴛鴦味嘅雪糕，更加將一個批一分為二，變為「菠蘿批」加「檸檬椰果批」，夠晒創新。

不過香港嘅朋友可能要失望喇，因為霆鋒噚日喺fb專頁寫道：「終於面世！#唔好問我點解香港無 #我都想知 #鋒味曲奇 #有空去食杯麥旋風」即係話以上幾款「新搞作」只限大陸，香港地區係冇㗎。