中銀香港係今屆京奧贊助商,冇耐前佢哋喺本港發行嘅奧運紀念鈔,全城哄動,唔講唔知,原來Chordio正式動筆簽約加盟中銀香港,咁啱都係8月8日,京奧舉行開幕禮當日。
以往經常出鏡見報,講解滙市同息率走勢嘅陳少平,今年年初離開任職超過廿年嘅花旗香港時,職位係該集團財資風險交易部總監。
雖然花旗家陣俾次按危機搞到好頭痕,之不過佢哋曾經係全球第一大行,財資市場發展方面,就更加係銀行界中嘅少林寺,訓練咗唔少專才同開創新產品,Chordio同佢喺花旗時代嘅老細、兼因病請辭中銀香港副總裁嘅陳子政,都係財資業界中嘅佼佼者。