每次見到恒隆地產(101)行政總裁陳南祿(Philip)，話題離不開商場與馬場，前者唔使講喇，恒隆主要經營商場，佢一定要落力sell，後者就因為佢係馬董，又係馬主，雖然佢馬運麻麻，旗下馬仔唔多聽話，好少跑出，全部退役，但佢依然唔信邪，繼續買新馬，華華都希望佢今次買中隻good弗靚馬喇。

Philip從紐西蘭買入嘅三歲新馬仔，已經到港，練馬師係徐雨石，而家操練中，計劃兩個月後先至出賽。

有新馬到，自然要諗個靚馬名喇，Philip好有心得㗎，以前做國泰航空(293)，馬名多數跟飛機有關，好似「有機可乘」、「時時有機」，之後佢加入恒隆轉行做地產，馬名就加埋個「地」字，好似「天時地利」，今次呢隻新馬，又要有天有地。

佢講笑咁話，原來有天有地嘅四字成語，多數唔吉利，好似「呼天搶地」，「頂天立地」等於企咗喺度，想話簡單啲叫做「好地地」嘞，但大家通常都係話「明明好地地，點知衰咗」又係唔多吉利，最後佢就扑槌，叫隻新馬做「天地同心」。

老實講，今時今日乜都話要潮，呢個馬名真係帶點娘味，英文名還好，叫Seize the spirit，不過名都唔係最重要，最緊要係隻馬識贏啫，加油。

蘋果財經，關心你飯碗
http://fb.com/appledailyatm