江若琳下星期日（23號）就會下嫁「生煎包王子」蕭潤邦（Oscar），佢今日喺尖沙嘴出席活動時話：「呢個係我2018最後一次出席公開活動，係婚前收爐日，亦係我最後一次以姓江嘅身份出席活動，下個星期就會跟人姓。」

雖然婚禮在即，但江若琳話好多嘢都未準備好，現時心情好抓狂，並相信自己係一個最遲派帖嘅新娘，佢話：「一年前公佈結婚一啲都唔緊張，覺得大把時間，但時間過得好快，o依家覺得最深學問就係編座位表，要顧及啲人坐埋一齊有冇話題，啱唔啱傾，又會唔會唔啱，我唔想悶親朋友。」

新娘子最着重婚紗，江若琳話仲未正式試過，唔會太性感，只有露背。婚禮流程則交由Oscar全權負責，江若琳話：「我叫佢唱歌，但佢話唔會唱，希望到時會有驚喜啦！」

呢對新婚夫婦婚後會立刻飛往英國度蜜月半個月，同樣地又係未有計劃，只係買咗機票，預算攞住兩個篋去到再算，江若琳話主要係去睇波，都會造人，好想結咗婚之後生個豬BB。

精選娛聞，喺晒《娛果》
http://fb.com/appledailyent