法國分組賽頭兩場打到死吓死吓,要最後一場贏多哥先出線,點知可以喺淘汰賽先後打低之前長勝嘅西班牙同巴西;法國有另眼相看嘅表現,除咗用慢熱解釋,忽發奇想,會唔會係教練杜明尼治特登玩走線?
法國次名出線,好多人都以為佢哋死硬;不過心水清嘅都發現,西班牙同巴西喺往績上都輸蝕畀法國。西班牙喺正式比賽未贏過法國;巴西喺世界盃,亦都連續喺98年同86年輸畀法國;法國玩走線唔係冇可能,事關首名出線,8強對住意大利,過關都係五五波。
如果信法國真係走線,今次對葡萄牙又要追上盤。法國喺往績上又係食住葡萄牙,00年歐國盃準決賽,法國憑施丹黃金入球,擊敗葡萄牙晉級。葡萄牙今屆賽事贏在防守好,教練史高拉利當然有功,不過其實對手有好多缺點。上仗對住打少一個嘅英格蘭,講真具威脅埋門,英格蘭甚至較葡萄牙多;16強對荷蘭,又係對手門前把握力極差,先至保持不失,葡萄牙後防好只係假象,喺小弟心目中,葡軍中堅卡維奴始終係計時炸彈。