煲呔今日上港台同一班會考生打氣,佢噚日就發表鼓勵會考生嘅電視講話,呼籲佢哋無論成績點,都要時刻記住命運喺自己手中,「珍惜上天畀我哋嘅天賦,發揮所長,一定能開創自己嘅天地。」
煲呔以獲得科大破格取錄嘅應屆會考生陳易希,說明衡量一個人唔係只憑分數;佢又引述已投身商界、今年參加會考嘅本港前首席單車選手洪松蔭嘅話,說明會考係一個經歷,成績唔重要。教統局局長李國章都有上電視,叫成績唔理想嘅同學唔好灰心,「人生難免有挫折,係要總結經驗,努力向前。」
仔女聽日放榜,父母又點會唔擔心。好似個女今年考會考嘅港台主持人車淑梅(圖),心情就有啲緊張,佢同八方講,已為個女做好兩手準備。若考得好好,可以俾人拔尖,就會升回原校中六;若攞A數目未夠多,都可以入李寶椿聯合世界書院,所以放榜日都無有怕,兩母女計劃聽日去酒店食早餐迎接放榜。