【Shine紅館騷】天佑蜜語獻愛妻 又南感觸深:阿媽打俾我,話阿爸又唔見咗…
又南紅館演唱會楊千嬅許志安天佑
組合Shine喺紅館舉行一連兩場《SHINE MONENTS Live2018》演唱會,噚晚係頭場,高潮迭起,又喊又笑牽動全場觀眾情緒,兩子亦感觸良多。
兩人大唱80年代一啲歌手嘅經典歌曲,亦有各自solo環節,又南打鼓,天佑嗰part就係邊彈鋼琴邊唱歌,又抱起女舞蹈員轉圈,面貼面跳舞。
之後再唱情歌時,天佑講咗幾句說話,冇指名道姓,但就似係對太太講:「我個人好容易唔開心,直到你出現,有你我就安心,變得好踏實。希望每一日起身睜開眼時,都係見到你。」
中場唱《陀飛輪》時,又南開始聲沙沙,佢話:「好感觸,呢首歌我諗起好多嘢,我爸患腦退化,之前認唔到我和阿媽。大家知我鍾意車,但0依家心態變咗。有日阿媽打俾我,話阿爸又唔見咗,我通宵搵咗佢幾日,終於搵到佢,嗰刻好開心,因呢件事令我明白到,有啲事唔可以咁執着,要珍惜家人喺身邊喺日子。」
現場播出舊片段,係佢哋扮成龍、李小龍打功夫,播完片後,赤裸上身嘅天佑拎住雙截棍出場扮李小龍,又南亦半裸登場大展努力操肌嘅成果,又跳鋼管舞轉圈,兩人打趣謂:「我哋本身係舞蹈員,係跳舞組合。」又南再話:「我覺得應該0依家就認真去學跳舞,唔通老咗先跳咩!」天佑即講有味笑話:「你驚你條腰老咗郁唔到?你驚揈唔起支嘢呀?男人條腰好緊要!」
臨尾唱《十八相送》時,Shine一時感觸邊唱邊喊,天佑更加感觸到踎喺地下話:「年紀大真係易感觸。」又南就話Shine喺10周年時開過一次演唱會,今次15周年再開,相隔5年都冇咩新歌推出,係觀眾令Shine實現夢想。Shine再話:「咁快就完第一場,好唔捨得,唔知幾時再見,但重要嘅係過程,希望大家記得Shine喺紅館唱過歌!」
精選娛聞,喺晒《娛果》
http://fb.com/appledailyent
又南喺演唱會中途,再次講到爸爸走失,令佢人生改變咗好多睇法。