Moiselle今晚喺銅鑼灣舉行時裝活動，最引人注目除包括特別嘉賓韓國女團f(x)成員Krystal，以及綁架案後首現身嘅Bossini已故創辦人羅定邦孫女羅君兒外，其他仲有剛宣佈懷孕三個半月嘅富商曾文豪愛女曾昭亮，賭王何鴻燊仔女超盈、超蓮同猷亨，仲有邢嘉倩等等富二代到場。其他賓客還有四太梁安琪、關之琳、利嘉兒及陳瀅等等。

剛推出全裸圖像文學《半透明的舞孃》的陳瀅，自言多咗工作，仲有廣告商邀請佢拍家具廣告。問佢係咪要喺床上碌嚟碌去？佢笑笑口話:「唔係，係拍得好健康0架。」

關之琳今晚春風滿臉到場，佢話今日下晝五點先至到場，換言之即係佢都冇諗住行騷:「睇騷係一種享受，見到啲model咁瘦，對自己係一種激勵。」

講到話最近有報道指關之琳著舊衫(其實有咩問題？)關之琳就話啲衫著得唔好浪費，又話:「其實平時冇乜嘢工作，我都好少買貴衫。」

關之琳又話都會搞舊衫開倉，或送俾朋友，不過友人就嫌佢6、7吋高跟鞋太高。講到生日將至，關之琳笑言都好忙，一個禮拜食咗三餐飯。至於正日是否陪男友？佢就冇特別答。

前亞視高層盛品儒同太太蔡一鳳今晚都有到，提到亞視有新買家，他表示有留意：「好慘，我已經離開咗兩年，成日俾人問，對亞視係一件好事，希望佢哋有新發展。」對於新買家表示會注資100億，盛品儒說：「注咗入去先知。」再問到亞視有否欠盛家嘅錢，佢表示唔太清楚：「真係唔知，知畀咗一筆錢家族。」

記者問他覺得亞視申請免費牌照是否樂觀，盛品儒認為：「樂唔樂觀另一回事，程序要一段時間，4月尾要釘牌，方向係點唔知。」雖然新買家揚言會減少重播節目，盛就笑言：「依家我有睇，多數係財經。」新買家更透露會加人工，解決拖糧問題，盛品儒表示：「真係唔知，拖糧梗慘，有新消息同有領導團隊有新發展。」