電競麻甩女神馬俊怡(Rose Ma)人氣高企，趁勢今年書展推出寫真，今日Rose喺書展為其個人首本寫真集《初次First Rose Ma》舉行fans見頁會，Tube dress現身嘅Rose，吸引唔少宅男圍觀，而同一個場地，之前係趙詠瑤同沙律搞簽名會，佢哋等埋Rose到場，齊齊交換寫真集，互相支持。

Rose除咗有自己寫真集之外，仲有一套多張Yes Card，佢坦言：「以前細個好鍾意扭Yes Card，不過都係明星至有，所以今次印畀自己出，算係一種虛榮感。」

為咗今次推出寫真集，Rose努力減咗8磅，但佢笑話：「fans鍾意我肉底，做運動係唔會令到上圍縮水，但可以令線條靚啲，keep住一星期2、3次健身。」今年好多對手，怕唔怕競爭大？Rose大方話：「唔好講對手，今年有好多朋友一齊出寫真集，好開心。」

寫真相有啲係內衣相，佢直言拍攝時都好尷尬：「事前飲咗少少威士忌，冇咁尷尬，呢個團隊第一次合作。」佢之前去咗日本影相，其中一個泳池景，係AV專用嘅場地，問到驚唔驚畀人覺得有拍AV感覺？佢就話無有怕：「我唔係拍AV，只係取景，地方係賣點。」

Rose豪言預咗fans會J圖，但就未遇到真人喺自己面前做啲咁嘅嘢：「平時喺社交平台啲留言，我就控制唔到，有啲粉絲嘅留言好露骨，我都唔好意思講出口。我仲收過fans send佢哋嘅重要部位相，平時都有，一見到即block。」佢又話唔怕被定型，性感都要睇意識，自己本書18歲以下可以買，問題不大。

松岡李那同楊思琦都推出寫真，Rose話平時都有留意佢哋消息：「佢哋都我嘅前輩，我好鍾意松岡李那，佢好有吸引力，陣間我都要去買佢本寫真。楊思琦咁勇敢，好佩服佢係一個媽媽，身形仲可以fit過我，睇到佢落咗好多苦功，拍寫真需要勇氣至出到，我自己都一樣，想挑戰自己，至會推出呢本寫真集。」

精選娛聞，喺晒《娛果》
http://fb.com/appledailyent