【新增影片】
荷蘭球王告魯夫上年過身，曾效力兼執教嘅巴塞隆拿，早前就搞過唔少紀念活動，為咗表揚呢位全能足球之父，更加準備興建一個以告魯夫命名嘅球場，俾巴塞B隊、女子隊等使用，預期2019年落成。

巴塞周四就進行告魯夫球場奠基儀式，好似名將恩尼斯達、告魯夫家人都有出席，雖然新場只容納6000人，不過作為B隊等球隊使用，亦都夠晒，主席巴杜美都希望，年青球員踏入呢個球場，亦可以告魯夫為奮鬥目標。