吹得就吹……即係咁，早前鄧兆尊接受ViuTV節目《晚吹—總有一瓣喺左近》之邀任嘉賓，講下各種鬼靈精怪嘢，咦，呢集講「勾元神」，係勾祥嫂個元神。係呀，兆尊真係咁講0架。

節目上，兆尊話佢同小艾十幾年前曾為解決家庭糾紛，而邀請師傅將祥嫂嘅元神勾出肉體。「佢意思係，如果傾掂數，佢第時再醒番之後，你再同佢傾，就容易啲達成共識。」勾元神呢個行動係要喺對方熟睡嘅時候進行，兆尊話：「首先搵一個八字同佢近、或者比較陰嘅人，做招引。開頭我個妹問一啲私隱啲嘅問題，佢答到喎！」兆尊仲話，過程中係「祥嫂元神」上咗師傅身，同兆尊佢哋對話。走之前仲同佢哋講會返番去某個地方，點樣去喺邊度好似Google Map咁詳盡講晒，然後記者跟地址去搵，咦，真係祥嫂喎！

兆尊仲話，勾出元神、再請對方歸位，當事人醒後唔知情嘅。至於之後同祥嫂有冇「好傾咗」，兆尊話：「見仁見智啦。」兆尊又分享自己喺爸爸祥哥靈堂上，因太攰，唔小心瞓咗，半夢半醒之間覺得有人大力拍佢後腦一下，擘大眼只見妹夫一人，距離佢十尺以外，令兆尊覺得係祥哥鬧緊佢「恰眼瞓」。

節目本月2號已播咗，信定唔信？不如問，祥嫂信唔信？

祥嫂唔答，由代言人黃夏蕙代答。噚晚祥嫂同黃夏蕙、艾美琦、邵音音同劉錫賢新田出席一個盤菜宴，記者想同祥嫂做訪問，佢好明顯係好避忌，堅拒受訪。跟住問佢點過年？佢匆匆回話：「冇節日，過日如過年，我身體好健康。」

講到請元神單嘢，夏蕙姨代答：「無稽之談，呢個世界邊有呢啲妖言惑眾？點搵得到個魂啫？我夠想勾好多人嘅魂囉，勾唔到0架。做人我哋個心最緊要行得正，係咪先？尤其係家庭，最緊要係以和為貴。點勾得到個魂啫？如果可以勾到個魂，真係唔知值幾多錢喇！所以我相信呢個世界係冇嘅！」係咪因為咁令祥嫂心情唔好？夏蕙姨擰頭話：「佢唔睇嘅，佢從來唔睇嘢，因為佢唔想聽。好多新聞佢都係唔知嘅，最緊要心情開心。」夏蕙會唔會講講番俾祥嫂知？佢話：「當笑料一則，算數啦，乜嘢都冇所謂嘅。」又話可能係傳媒寫多咗，唔係兆尊講嘅，點知當知道真係出自兆尊把口，夏蕙姨頗愕然：「吓？真係呀？兆尊未成熟，慢慢來。」

黃夏蕙又話，喺新田村入面住咗5年，每年有盆菜宴，今年佢叫村長搞大佢，所以叫咗佢朋友來，問佢祥嫂係咪唔開心？佢代答：「唔係，佢4月22日都答應我去新光唱《萬惡淫為首》。」