《蘋果》噚日寫市建局同房協計劃合作發展，有市建局董事同八方講，噚日有記者搵佢回應呢件事，佢又唔係好知講緊乜，諗住等市建局出咗局方立場（line-to-take）先答記者，點知一等就等到下晝收工前先收到。
咁都未算，佢睇完條局方立場，真係唔知點回應記者好，因為三行line-to-take完全冇提究竟市建局係咪同房協傾緊，只係話「任何人士、機構、或發展商提出對重建工作或居民有幫助的建議，市建局都會積極探討」，八方聽佢講到咁躁，只好安慰佢市建局方面都好難做，事關涉及敏感商業決定，唔係好方便講，而且呢類問題，可能知少啲重有着數，免被人話有瓜田李下之嫌！


E-mail：[email protected]