【更新影片】

剛剛星期一（24日）嘅賽馬節目《後生仔傾馬仔》請到冠軍騎師潘頓，同我哋一班後生仔女GM張凌良、傑少及Elsa小希等，以video talk形式分享好多心底話，以及回應馬迷嘅敏感話題。

今季潘頓成績咁好，其實同「美麗傳承」以及「時時精綵」有好大關係，因為呢兩匹馬合共為潘頓帶嚟七場一級賽頭馬，亦係令佢能夠打破獎金紀錄嘅最重要因素。

潘頓表示呢兩匹馬下季會繼續有好表現，甚至比今季更強！講到「美麗傳承」，潘頓話喺呢匹馬將來退休後會好掛住佢，呢匹馬亦為潘頓圓夢，因為佢認為一位騎師，總要有一匹標誌性嘅馬王，而「美麗傳承」就當仁不讓，不過唔會取代到「友瑩格」喺佢心目中嘅地位，因為「友瑩格」除咗喺三地都贏一級賽之餘，喺多次受傷後仍然能夠重振雄風，令潘頓相當感動。

雖然「美麗傳承」所向披靡，不過潘頓唔覺得下季佢可以成為三冠王，因為2400米遮打盃對牠難度實在太大；至於「時時精綵」，潘頓認為今季跑遮打盃嗰場，係佢全季贏得最辛苦嘅大賽，因為隻馬跑落欠順，檔位又差，好難攝到靚位跑，好彩最終都贏咗。

此外，潘頓亦有點名寄望「常感恩」、「忠心勇士」、「遨遊戰士」及「日日精彩」等，下季會大放異彩，繼續帶畀佢更多頭馬。

有馬迷問到，如果「巴基之星」由潘頓接手，會唔會重振雄風，潘頓自信講一定會！同埋佢認為隻馬其實最適宜跑泥地，可惜暫時牠冇機會爭泥地賽事。潘頓指「巴基之星」試泥閘之走勢，未見過一匹馬如牠般厲害，所以佢好希望夥拍呢隻馬出戰海外泥地大賽，如杜拜世界盃、育馬者盃經典大賽。

與此同時，潘頓坦白表示，自己下季好難複製今季咁輝煌嘅戰績，因為除咗雷神莫雷拉會做番公司騎師之餘，亦有新好手薛恩等來港獻技，所以希望馬主同練馬師，能夠繼續支持佢。

不過神級騎師都有失意時，潘頓表示，今季有兩場賽事令佢耿耿於懷，第一就係「好運」意外重重輸條頸；第二就係「志在四方」塞足大半條直路跑梗頸四。佢話「志在四方」有位根本贏硬，結果輸形勢好可惜。

問到佢有冇後悔「志在四方」嗰場嘅發揮，潘頓都話返去睇片，認為嗰場自己做錯決定，如果選擇抽出去衝而唔係喺馬群博位，應該都贏咗，有時就係一個決定影響咗勝負。

有馬迷留意到，潘頓贏大賽嗰陣，甚少會好似柏寶、戴圖理咁激動振臂慶祝，潘頓就話其實自己好開心，不過自己本身唔係容易流露情感嘅人，每次贏馬，心入面都好有滿足感。

講到佢一對子女Cash同Roxy，潘頓話唔太希望佢哋做騎師，不過Cash對賽馬好有興趣，如果日後佢真係成為騎師，佢唔會反對；至於女兒Roxy性格上比較驚青，唔太適合做騎師。

潘頓亦講到，佢唔太想退休後學韋達轉做練馬師，不過太太Nicole就好想佢掛靴後從練，佢仲笑笑口話自己比較適合做評馬人，因為佢成日意見多多！

被問到點睇一班本地薑，潘頓就點名讚華將一哥何澤堯，認為佢今季表現非常突出；另一方面，潘頓提到自己嚟香港贏盡榮譽，唯獨一直與「最受歡迎騎師」獎項無緣，佢亦百思不得其解，但畢竟係馬迷投票，佢亦認為無傷大雅，平時亦唔會留意馬迷喺社交平台對自己嘅抨擊，佢話忠於自己就夠。

最後講到近日熱話《撤回惡法》兩次過百萬人遊行示威，潘頓話自己都有留意新聞，亦好明白點解香港人對呢條條例咁反感，雖然自己唔係政治人物，但佢支持香港人團結一致。

重溫今集潘頓做嘉賓嘅《後生仔傾馬仔》可撳呢度

-----------------------------
7月4日起 《蘋果動新聞》只限升級壹會員閱覽
繼續撐蘋果！