利物浦喺周日英超作客韋斯咸大勝4:0，爭下屆歐聯入場券形勢大好。紅軍喺韋斯咸嘅倫敦球場贏波之後，歷來英超已經喺52個唔同球場贏過波，唔計自己地頭晏菲路都有51個，冇其他球隊夠紅軍咁多。

利物浦喺52個不同球場拎過英超勝仗，第2位係佢哋喺季尾爭前4嘅競敵阿仙奴，以及死對頭曼聯，兩隊都喺50個不同球場贏過波，隨後就係車路士，48個球場。

利物浦征戰英超二十幾年，至今只有3個球場係佢哋未曾贏過波，包括黑池嘅布隆菲特球場、錫菲聯嘅巴拉摩徑球場同埋諾定咸森林嘅城市球場，不過3隊波依家都唔喺英超，要征服埋佢哋都有難度。