33歲嘅苟芸慧近排桃花旺盛，短短半年，先傳佢撻着好友朱璇男友湯珈鋮，再秘交經濟發展及勞工局前局長葉澍堃細仔葉瀚華（Ian），最近仲話佢撻着馬來西亞錫礦大王陸佑後人嘅陸恭和，有周刊影到苟姑娘去銅鑼灣shopping完，陸恭和就做柴可夫，揸Benz接載佢。

不過日前有讀者丁先生爆料，話陸恭和已有一位拍拖多年嘅女友，女友正正係前無綫主播、有「翻版梁詠琪」之稱嘅張頌恩，喺張頌恩嘅fb仲貼咗好多同陸恭和嘅合照，情侶關係好明顯，似乎苟姑娘疑再次落錯盤！

噚日苟姑娘喺微博留言，言談間似乎要保護緋聞男友，曾經有傳因為湯珈鋮而反面嘅朱璇今日喺苟芸慧嘅微博留言話清者自清，叫佢加油。苟姑娘好快回覆朱璇話：「謝謝你的鼓勵，這個看似簡單的動作除了支持其實也澄清了那些不實的報導，懂我的人總是特別溫暖，我們等工作不忙時再聚吧。」