麥菲文馬房行馬機意外喺馬圈內外都有好大迴響，馬會CEO應家柏於上個（10日）賽日後就主動作出回應，雖然老應唔同意馬會封鎖消息嘅講法，話冇影響公眾利益，但係佢就話會尊重唔同意見。

老應始終都係作風開明嘅領袖，唔係被人批評、唔啱聽就張牙舞爪，如果多啲人好似老應咁多方面睇人睇事，或者社會都會少好多爭拗。

除咗今次行馬機意外，老應上季尾亦有親身處理搞到滿城風雨嘅「文藝學家」事件。今晚（13日）「文藝學家」係上季出事後首度出賽，繼續由潘頓騎，肯定係今次夜馬焦點所在，相信所有馬迷都會睇到實呢隻馬點跑，究竟隻馬今次會唔會用回贏馬嘅留後跑法，抑或騎師又話留唔住隻馬走去放頭？

過去被競賽小組問話抽秤完嘅問題馬，下仗再出幾乎必定會跑到冇影，無非為免自打嘴巴希望洗底。

不過，近季問題馬再跑必輸，已非必然嘅潛規則，被問話後下場即搏嘅例子都有唔少，唔敢一口咬定「文藝學家」唔使睇。

馬迷都唔一定要真金白銀投注「文藝學家」，淨係睇吓隻馬今場點跑已經夠過癮。高伯新上季畢到業，今季一開局已經開始搶攻，「文藝學家」喺三班公認有質素，高伯新贏馬都要靠呢類質新份子，照計都唔敢托大。

況且佢決定唔換人繼續配潘頓，應該經過深思熟慮。明知全世界睇到實，潘頓今場應該亦唔敢再玩火，點都會全力以赴。

潘頓今季個頭開得唔係幾好，只係贏得兩場，應該都想急起直追，今場佢分別操過「文藝學家」同「翡翠福星」，潘頓最終揀騎「文藝學家」，照計就唔會揀錯。至於問題馬值唔值博，馬迷就自行判斷。

阿Joe