【名家搶先睇】香港充滿了孕育老千的養分(郭釗)
郭釗
Bitcoin掘礦機合約,接二連三爆煲,有堆苦主走到民主黨那裏申冤,話大家夾埋唔見幾百萬,其實投資老千局何止虛擬貨幣呀,劏場、細價股、外地樓,甚至借貸都有。今期不會逐一擊破各式各樣的騙局,只想研究一下為何那麼多香港人落疊,而且同一招中完又中。
先講特徵:銀碼細、回報高、唔使學、一朝發達,結果輸乾輸淨,見到這類新聞,不少人揶揄受害者貪字得個貧,但可能他自己亦曾是受害者。香港社會,每人每日平均工作時間超過10小時,而且工作壓力大,返工過程已消耗一個人過半的精力,哪有時間和閒情逸致去研究投資。
就算你好彩搵到份可以hea工,都是對著電腦,腦上談兵。買實物要實地考察及大量數據分析,買股要進入市場參考成交大戶動向收風,但大多散戶就是不願或不造就花時間在重要的事情上,也不是個個有足夠分析力,所以寧願博一博。
普遍香港人的閒錢用作投資的不多,眼見當紅KOL吹噓自己如何從冇變有仲發大達,不期然心中嚮往,聽得多就更加深信不疑,搵一個認為最有料、最合眼緣、感覺最可靠的KOL跟住買就心安理得,好似有大樹遮蔭。
其實投資邊會咁便宜,就算KOL冇點你,投資市場瞬息萬變,就如現在「侵侵」話打又唔打的貿易戰,成日出口術令到經濟倍加動盪,你對本身的那項投資不了解,總是沒信心長揸落去,就算贏都會變成輸,更何況市場上呃人者居多,接近九死一生。投資從來是靠自己苦研,才敢瞓身長揸,穩收長贏,返工返到冇時間但又想投資發達的心態,才是真正的元兇。
郭釗
https://www.facebook.com/heaology.edu
全球樓行 Dream House零距離
https://hk.feature.appledaily.com/overseasproperty