韓國收費台tvN王牌節目《一日三餐》噚晚播出「大海牧場篇」最新一集，更邀得女團AOA人氣成員雪炫任嘉賓。雖然製作組早前已經率先公開Eric、李瑞鎮、尹鈞相、雪炫四人融洽相處嘅片段，但其實李瑞鎮一開始認唔出嘉賓係雪炫，當雪炫現身得糧島嘅住所時，李瑞鎮仲問「佢係邊個」，引起爆笑。

而Eric及雪炫因為都係偶像組合出身，兩人有共同嘅話題而好快變得親近，亦多得Eric，雪炫同李瑞鎮、尹鈞相亦變得熟絡。噚晚節目尾段播出下周嘅預告，只見四人神色都唔多好，雪炫更突然喺鏡頭前落淚，令觀眾好奇係咪眾人之間發生唔愉快嘅事，不過畫面好似被煙霧包圍住咁，似乎因為火勢太猛導致大太煙，搞到眾人唔舒服。

另外，《一日三餐》噚晚一集收視達9.116%，最高收視高達12.1%，繼續稱冠同時段之外，亦比上周嘅8.330%收視率升咗唔少，所以有媒體指多得雪炫演出先有高收視。對於《一日三餐》有高收視率係多得雪炫任嘉賓嘅講法，就引起網民爭議，有唔少網民指《一日三餐》一向都係收視保證，唔會因為雪炫演出先突然多人睇；亦有網民指因為MBC人氣節目《我獨自生活》停播先帶挈《一日三餐》收視率，唔關雪炫事。