江華、麥潔文（Kitman）同陳奐仁，噚晚喺又一城戲院出席《勁舞Dancing癲》首映，江華話佢同老婆成日都二人世界拍拖睇戲，今次係畀戲名吸引捧場，江華話：「我老婆係勁舞dancing queen，所以梗係要陪佢嚟睇。」Kitman表示鍾意睇跳舞，笑言自己最叻跳草裙舞：「o依家都係教表演，我哋唱一世歌，跳一世舞，自己表演都會跳吓，下個月都會有演出，幫陳志雲做嘉賓。」之後又問到江華最近忙住做啲乜嘢？江華好神秘話：「上次畀狗仔影囉，老婆就話唔好講，咁我就唔講。」

成為肌肉男嘅陳奐仁笑言，初時老婆唔鍾意佢一身肌肉，但係o依家鍾意一手可以攬住佢，陳奐仁仲即場分享心得，佢話初期減肥做運動唔應該戒口，要保持正常飲食：「好多人犯錯只做帶氧運動，因為冇建立肌肉就運動，其實只係減少咗水份同肌肉，當停止做運動就會反彈體重。有好多藝人朋友問我減磅心得，我好樂意分享，不過唔知10個有冇5個跟住做。」

精選娛聞，喺晒《娛果》
http://fb.com/appledailyent