菲菲認為單有創意，即使住蝸居都可住得有型。今日菲菲決定借兩個新聞人物，令大家宜室宜家有辦法！
首先係CY，六四時講過啲乜佢唔記得，但偏偏記得12年前去山頂大宅睇樓時，其中一間房貼滿HelloKitty，明顯佢係畀呢間特色房間吸引住。特色牆？OUT啦！用主題房啦！第二位教大家室內設計嘅係「兒歌天后」Purple姐姐，破天荒將家傭張碌架床，放喺廁所上面，睡床廁所10秒直達，方便家傭，非常貼心。最重要係Purple姐姐喺千八呎豪宅入面，成功劏出板間房，盡顯「天堂地獄一線之差」，少啲創意都唔得。
讀者可借CY同Purple姐姐為人辦，令蝸居更具特色。菲菲唔係富家千金，冇錢建地牢玻璃房，令間屋更有睇頭；近來仲要捱糧尾，食晏靠一個飯盒幾十蚊嘅大家樂（341），好貴啊！大家樂全年賺少咗，但噚日以大陽燭衝破保歷加通道頂，成交配合，走勢搶鏡，如短期上破22元，相信升勢會繼續靚仔，到時可買入大家樂對冲飯盒。

Fifi
本欄逢周二、四刊出