住大埔的標準馬迷吳生，過往都會坐872號巴士由沙田馬場到大埔中心下車，但他今天決定坐的士，「上星期發生咁大件事，仲邊度敢坐呀！」

吳生表示，上星期原本打算坐872離去，但當日卻因有事要去荃灣，所以避過一劫，但同行友人因要去大埔，所以建議友人坐872巴士，結果友人因此而在意外中喪命。對於悲劇事件，吳生顯得十分悲傷，不欲多談，「唉，個感覺好似叫咗佢去死咁。」

吳生指，相信每個司機駕駛態度不一樣，但認為巴士公司有改善地方，「平時一完場啲人多到爆，話巴士坐滿就開，到底點為之滿呢？係咪應該有職員在現場維持吓秩序同指示好啲呢？」他直言短期內都未必會再坐872號巴士，「起碼過一排等心理陰影過咗先。」

記者：金敏琍 徐雲庭

你敢爆，我敢獎！ 即Call《蘋果》24小時爆相爆片熱線 ：63836568