立法會昨復會，討論到取消委任區議員問題，政府死都唔肯講取消嘅時間表，鄭家富批評政府冇信用，事關當日爭取通過政改方案時，講過會有交代，家陣卻唔認數，對支持政改嘅議員過橋抽板。

鄭家富又話當日民主黨以為委任制取消在望，所以轉軚支持政改方案，見到前黨友被政府用完即棄，感到極之痛心。據說杜月笙自嘲被蔣介石視為「政治尿壺」，民主黨只係紙尿片，或者即棄隱形眼鏡，遭遇已經好好多。
新官上場嘅政制局局長譚志源，表現被議員形容同前任差唔多，有做「人肉錄音機」潛質，譚志源唔敢僭越，叫大家唔好亂幫佢起花名。