賭王三房子女各有各忙，猷啟就忙搞婚事、超蓮就開台式牛肉麵店，而大女何超雲相比下，近年生活最深閨，最愛做貓奴，不時都愛貼相上Ig分享佢嘅宅女生活，日前晏晝4點半，佢就做乖乖女同阿媽陳婉珍去銅記shopping，超雲就白tee襯上一件衛衣同短牛仔褲騷長腿，而三太都一身tee恤運動褲打扮，同行仲有一個女助手，三人齊齊去咗一家日本品牌家品店購物。

現場所見超雲比較心急，一落車就急行，而三太就相當滋柔慢慢行。超雲一行入店內，即有目標地走上一樓，落力睇杯碟等家品，好快已鎖定目標，而助手就幫手拎購物籃。期間，超雲都有行去問阿媽意見，兩母女研究一輪，超雲就再去掃餐具同毛巾等物品，逗留咗近半粒鐘，就排隊畀錢走人，佢就同助手一人一袋拎戰利品。

三人離開家品店，就行到附近一間日本超市，超雲就同阿媽分頭睇嘢，超雲睇吓零食，而三太就同助手專攻日式醬汁，見三太凝神望咗好耐，但最後都冇揀到合適貨品，而超雲再專去睇健康產品，就買咗草藥熱敷墊，認真識養生。超雲等人逛了約10分鐘就離開，而司機就一早嚟到接佢哋返歸。

精選娛聞，喺晒《娛果》
http://fb.com/appledailyent