立法會選舉提名噚日踏入第三日，首日爭崩頭搶位情況唔見晒，全日竟然只得工聯會嫻姐同理事長黃國健一張名單報名出選九龍東，其他區同功能界別水盡鵝飛，冇人交表，真係出奇，有人幫八方揭一揭《通勝》，原來噚日諸事不宜，怪唔之得啦，哎，嫻姐揀正噚日報名，咪好弊？
嫻姐歷年參選都係排頭位出選，今年卻屈居第二幫黃國健抬轎。九龍東今年由五席變回四席，即係話好有可能恢復民主派、左派兩大陣營各佔兩席格局，民主派現任李華明、梁家傑看高一線，左派民建聯陳鑑林穩佔一席，工聯會名單頭位者肯定入局，排第二嘅嫻姐，一般相信要重返立法會難度甚高。
要成功連任，嫻姐惟有吸盡左派票源，佢噚日聲言今年唔會再同民建聯配票，總之就各有各做，就算係同一個阿爺都冇面畀。嫻姐今年盡地一煲，表面原因係工聯會要捧新人上位，嫻姐在位多年，為人作嫁衣裳都無話可說，江湖傳聞卻指某些方面對嫻姐有微言，認為佢置身建制派，卻對政府大罵小幫忙，因此唔再睇佢，要求換馬，不要再添煩添亂。

望黃國健處事激啲

對於呢個說法，工聯會同嫻姐一直不置可否，嫻姐噚日卻交帶黃國健，話希望佢繼承衣鉢，日後處事激啲，唔知係咪想向有關方面表態，就算換人都無補於事。亦有一個說法，指嫻姐的確唔介意讓位，今次排第二位，既可交棒，就算落選，亦留下提攜新人聲譽，從容退出舞台，輸得光彩。
上述講法聽落都言之成理，點講都好，嫻姐今次搏晒命吸票似乎事在必行，需知道四年前陳鑑林當選，多得西環指揮配票，八方記得當時嫻姐對此好介懷，因此今年拒絕再同民建聯分票，陳鑑林要自食其力。民建聯方面唔會坐以待斃，好多人深信，西環喺最後時刻自會出手主持大局。
事實上北京對選舉睇得好緊，可以媲美奧運，香港小官僚懶醒，有樣學樣鬼咁緊張，噚日嫻姐等人去觀塘民政處交表，工作人員禁止助選團穿制服入內，人人要除衫，最離譜係連記者手持候選人政綱都受干預，八方仲以為去睇奧運馬術賽，要安檢搜身先可以入場。
mailto:[email protected]