曼聯轉咗三間波衫，出咗個曼聯球員用魔鬼叉插玻璃嘅廣告，好唔好睇就見仁見智，可以肯定嘅係有人覺得啲改圖好好玩。

有人將桑馬達扲住支叉嘅圖，key咗喺唔同嘅地方，用佢去插唔同嘅人，當中包括幾個經典場面，有費蘭度托利斯畀莊尼伊雲斯侵犯後跌低啦（當時前者畀球證話插水，兩黃一紅）、謝拉特跣腳等等。但最令曼迷大快人心嘅，應該唔係插托利斯或者謝拉特，可能係插返曼聯自己球員－迪馬利亞。

話說呢個英超最高身價球員，喺曼聯第一季表現麻麻，今個夏天就想走去巴黎聖日耳門。上年夏天仲好期待迪馬利亞嚟嘅曼迷，家陣就想快啲趕佢走，皆因佢私自走去體測之餘，仲要未正式轉會，就已經講定「我好開心可以加盟PSG」。

曼聯7號波衫嘅意義重大，迪馬利亞今日搞成咁，仲畀人話係曼聯史上最差嘅7號。相反早幾日正式轉投會里昂嘅「細孖」拉菲爾達斯華，走咗仲記得多謝曼聯，兩個人嘅品格，高下立見。