莊思敏（Jacquelin）今日以一身超貼身裝束現身上環，為財務公司拍攝全新一輯廣告，而剛宣佈懷孕三個多月身孕嘅李漫芬，就到場陪有份演出嘅老公談成坤開工。

年屆43歲嘅李漫芬，加入高齡孕婦嘅行列，佢話起初都唔知自己有咗BB，仲一心去睇看醫生嚟調理身體，點知喺醫生嘅建議下驗孕，發現真係有咗BB，佢話:「我通知老公時，佢仲恭喜我。」李漫芬話希望可以順產，老公亦答應陪伴在側，暫時仍未知BB性別，講到高齡懷孕，醫生有冇叮囑佢加倍小心，佢話:「初時要成日瞓床，要取消返大陸拍劇，又不時作嘔，O依家好咗好多，但口味就轉咗鍾意食辣。」

同場嘅Jacquelin喺拍廣告時，喺換貼身衣時發生小意，但唔係大件事，只係件衫爆線啫，佢話其實貼身衫比性感衫更難着，因為性感衫只係擔心走光黐膠紙，但貼身衫完全冇得遮掩。講到酬勞，Jacquelin 就話非常滿意，仲笑話因為財務公司最多係錢。

提到借錢，Jacquelin話o依家只會介紹人向財務公司借，自己唔會再借錢俾人，佢話:「試過有位好熟朋友有需要，借咗六位數畀佢，跟住冇還。」問到是否已經因財失誼？佢話:「少見咗。」佢又澄清並非外界覺得佢咁有錢，佢自認硬頸，試過出嚟工作後冇錢，寧願賣手袋賣名錶亦唔問家人借錢，為免被人認出身份，佢戴住口罩去當舖。